យុទ្ធសាស្ត្រថ្នាំកាដូទី 2 ឬទី 4បែរជាត្រូវរងការរិះគន់យ៉ាងខ្លាំងជាពិសេសការរិះគន់ពីខាងអង្គការសុខភាពពិភពលោក
ដោយសារមានមជ្ឈមណ្ឌលសុខភាពសាធារណៈក្នុងភូមិស្រុក ដោយសារបានបញ្ជាទិញថ្នាំបង្ការកូវី១៩ តាំងពីផ្ទុះជំងឺរាតត្បាតដំបូងភ្លាម និងដោយសារមានវប្បធម៌ចាក់ថ្នាំបង្ការ ស៊ីលីជាប្រទេសបានចាក់ថ្នាំបង្ការកូវីដ១៩បានច្រើនជាងបង្អស់មួយនៅលើពិភពលោក។ ជិតពីរដូសកន្លះជាមធ្យមសម្រាប់ប្រជាពលរដ្ឋ១០០នាក់។ ពិតជាតួលេខដ៏ខ្ពស់ខ្លាំងដល់កំពូលតែម្តងក្នុងចំណោមបណ្តាប្រទេសក្នុងអង្គការកិច្ចសហប្រតិបត្តិការនិងអភិវឌ្ឍន៍សេដ្ឋកិច្ច OCDE។
ហើយអាជ្ញាធរស៊ីលី មិនបង្អង់សកម្មភាពទេ។ តាំងពីខែមករាមក ស៊ីលីបានចាប់ផ្តើម ចាក់ដូសជំរុញទីពីរ ឬត្រូវជាដូសទីបួន ដល់អ្នកមានជំងឺខ្សោយប្រព័ន្ធការពារខ្លួន និងដល់ក្រុមបុគ្គលិកសុខាភិបាល។ យុទ្ធនាការចាក់ដូសទីបួន សម្រាប់ពលរដ្ឋអាយុលើសពី ៥៥ឆ្នាំ ត្រូវចាប់ផ្តើមនៅថ្ងៃ ចន្ទទី ៧កុម្ភៈនេះ។
ប៉ុន្តែយុទ្ធនាការចាក់ដូសទីបួន មិនបានទទួលស្វាគមន៍ដូចដូសមុនៗទេ។ ផ្តើមដំបូងគេបង្អស់គឺពាក្យរិះគន់មកខាងអង្គការសុខភាពពិភពលោក។ ហេតុអ្វី ? ព្រោះថ្វីបើ វ៉ាក់សាំងដូសទីមួយ មានប្រសិទ្ធភាពដោយអាចផ្តល់ភាពស៊ាំដល់សរីរាង្គកាយមនុស្ស ហើយដូសទីបួននឹងបង្កើនអត្រាអង់ទីក័រឱ្យនៅកំរិតខ្ពស់មែន ប៉ុន្តែបើតាមការសិក្សាអ៊ីស្រាអែល វ៉ាក់សាំងដូសទីបួននេះគ្មានប្រសិទ្ធភាពទប់ទល់នឹងអូមីក្រុងទេ។ ថ្នាំបង្ការផលិតឡើងដោយផ្អែកលើគំរូនៃមេរោគកូវីដដើមប៉ុណ្ណោះ។ មូលហេតុទីពីរ គឺសង្គមលែងចាប់អារម្មណ៍។ បើតាមការសិក្សាអ៊ីស្រាអែលដដែល ក្នុងយុទ្ធនាការចាក់ដូសជំរុញ (ដូសទីបី) ពលរដ្ឋនាំគ្នារួសរាន់ទៅរកចាក់ តែគ្មាននរណាសូវអើពើសោះនៅពេលបើកយុទ្ធនាការចាក់ដូសទីបួន។
ដូសទីបួន មានប្រយោជន៍មិនអាចប្រកែកបានទាំងផ្នែកវិទ្យាសាស្ត្រនិងសង្គម សម្រាប់តែមានជំងឺប្រព័ន្ធការពារខ្លួនខ្សោយនិងអ្នកប្រឈមខ្លាំងនឹងមេរោគ។ ផ្ទុយវិញ គ្មានអ្វីបន្ទាន់សោះសម្រាប់មនុស្សធម្មតា មានសុខភាពល្អមាំមួននោះ។ ម្យ៉ាងវិញទៀត គេអាចរង់ចាំបាន ព្រោះពេលនេះ ក្រុមហ៊ុនPfizer Moderna កំពុងសិក្សាធ្វើបច្ចុប្បន្នភាពថ្នាំបង្ការសម្របទៅនឹងមេរោគកូវីដបំប្លែងខ្លួនអូមីក្រុងហើយ។ មន្ទីរពិសោធន៍ទាំងពីរបានសង្ឃឹមថាថ្នាំបង្ការប្រឆាំងកូវីដអូមីក្រុងនឹងអាចធ្វើចរាចរណ៍បាននៅរដូវក្តៅខាងមុខ៕
0 Comments